暴力抗爭分分鐘可能喺政改表決之時大爆發

立法會表決政改方案進入倒數階段，日前多個團體聲稱屆時喺議員表決政改方案期間包圍立法會，部分激進分子甚至有意同警方決一大戰。立法會大樓外添美道同立法會道行人路一帶佔領帳篷數亦都愈來愈多，增加至近二百個，個別帳篷仲設有鐵門、密碼鎖同閉路電視等，並乙太陽能板供電。而且帳篷內外都堆放咗雜物，包括百幾個未有標示用途嘅玻璃樽、大批頭盔、滅火筒及多部手推車等，令人擔心可能隨時都會爆發二次佔領。
風頭火勢之下，網上仲流傳出一本長達24頁嘅「抗爭手冊」，手冊封面印有「V煞」肖像，全文用黑底白文編成，分為「序」、「戰前準備」、「裝備全覽」、「個人訓練」等幾部分，煽動喺政改問題上要孤注一擲，勇武抗爭，寧化飛灰，唔做浮塵。由此睇來，進一步嘅暴力抗爭正醞釀緊，政改表決時分分鐘可能大爆發，後果唔堪設想。
咁嘅架勢，睇怕政改方案表決到來之時勢必有一場大戰，舊年佔中嘅一切可能又捲土重來，香港到時恐怕亦都會被搞到烏煙瘴氣。政制發展固然重要，但經濟民生亦都同樣重要，當社會資源同大部分精力都集中喺政治爭拗上嘅時候，邊個又真正關心香港未來嘅發展，邊個俾心機做嘢？咁樣落去係唔得嘅。